Accueil | Nouvelles | En Kreyol | Ayiti Nostalji

Ayiti Nostalji

Taille de la police: Decrease font Enlarge font

Ayiti bèl ti peyi, 

Ayiti peyi solèy, 

Ayiti peyi mèvèy, 

Ayiti peyi bèl plaj, 

Ayiti peyi bèl fanm, 

Fanm jansiv vyolèt

Fanm bèl danfans, 

Fanm kayimit

Fanm kreyòl, fanm grimèl

 

Ayiti se yon mango fransik, 

Yon mango doudous, yon mango miska, 

Yon mango kanèl, yon mango kòdòk.

Ayiti se yon dous Makòs nan Ti Gwav

Se yon dous Man Michlo nan Ench

Se yon anana pennsik nan Tomasik

Yon manyòk ak kabrit nan Bòkbanik

Se yon rapadou tikayèt nan Tomond

Se yon lalo Latibonit

Se yon tomtom, yon konparèt nan Jeremi

 

Ayiti se yon fresko sou chandmas

Se yon chenjanbe, yon manjé lòbèy, 

Yon fritay, yon pate kòde 

Se yon akra, yon marinad, yon bannann peze

Yon nwa boukannen pou fèt drapo 18 me

Se yon donbrèy nan sòs pwa

Se yon ragou tèt kabrit, yon tchaka

Se yon mousa, yon doukounou 

Yon tablèt jijiri, yon konfiti zoranj si

Se yon mayi boukannen, 

Yon amizman byen griye

Yon kann anana bò estad Silvyo Katò

 

Ayiti se yon tire kont nan lanjelis

Se yon twa fwa pase la nan lalin nouvèl

Se yon lago lago ti sangle, 

Se yon zonbi bann mannan

Se yon kachkach liben sere liben                                                                                                                              

 

Ayiti se yon monte kap,

Van vini m’a baw bonbon

Se yon sote kòd, 

Yon jwèt marèl                                                                                                                                                                   

Yon oselè Do Kre, I, S

Se yon jwèt mab tèk tout mò rèd

Se ti gason met bout pantalon jiska laj douzan

Se tifi penyen ak ne ak boul gogo jiska kenzan

 

Ayiti mwen sonje’w  anpil

Mwen sonje Gwayanmouk                                                                                                                                                   

Mwen sonje Boukan Towo                                                                                                                                                  

Mwen sonje Bouki ak Malis

Mwen sonje ji papay, ji grenadya

ji kowosòl, ji kachiman,

Akasan siwo ak anpanna

Mwen anvi bwè te vèvenn                              

Te bwadòti, te senne, te simen kontra

Te lyannmòl, te choublak, te dèdo

Te bazilik, te sowosi, te sitwonèl

 

Mwen ta renmen chita aba yon pye siwèl 

Kote bon jan van ak fè kalinda

Pendan map manje kenèp 

ak pengwen boukannen

plis kasav doup pendou ak zaboka

 

Mwen sonje son pipirit, 

Son krikèt, son zandolit, 

Mwen anvi wè yon chan toutrèl

Kap fè ale vini, tolalito nan karetèl lesyèl

M’anvi wè malfini, tchit, sèpantye, konglaw 

Zòtolan, kwakdlo, kaw ak poustabak                                                                                                                                                                       

M’anvi wè pye rakèt, pye mestiyen

Pye bayawonn ak pye galgaw

 

Ayiti malgre ou pedi fèy                                                                                                                                                                                                                                 

Wap toujou ret nan kèm                                                                                                                                                                                                                                   

Wap toujou rete yon bèl chelèn                                                                                                                                                                                                                       

Drapo w  ap toujou flote alawonnbadè                                                                                                                                                                                                               

Paske ou se senbol libète                                                                                                                                                                                                                                 

Ayiti mwen renmen w anpil                                                                                                                                                                                                                                

E mwen renmen w pou la vi.  

Ives Isidor 18 mai 2017




Audionow:
Etats Unis: 641.552.5200 T-Mobile/MetroPCS: 360.398.4333 Canada: 438.795.4395 514.900.6012 Bresil 021 40 42 11 31 France: 01.90.14.14.75 Republique Dominicaine 849.936.7140 Mexique 08.99.27.46.700
Studio: 718) 355-9853 / (718) 303-2551 / (509) 2813-9450 / (509) 2813-9452 / (509) 2813-9456 Adresse: 45, Rue Chavannes Port au Prince, Haiti
Email: radiocaraibesfm<at>yahoo.fr
Tél: (509)4300-4300 / 3701-4300
WhatsApp: (509) 3701-4300

  • email Envoyer par email à un ami
  • print Version imprimable
  • Plain text Texte complet
Notes
Pas de note pour cet article
Estimez cet article
0